Наурыз мерекесі / Праздник Наурыз

Мектебімізде ұлыстың ұлы күні – Наурыз мерекесі биыл ерекше сән-салтанатпен, кең көлемде және жоғары деңгейде аталып өтті. Бұл мереке тек күнтізбедегі атаулы күн ғана емес, ата-бабамыздан жеткен салт-дәстүрімізді жаңғыртып, ұлттық құндылықтарымызды дәріптейтін, бірлігімізді бекемдейтін ерекше рухани мереке екені баршаға сезілді.

Мерекенің басты ерекшелігі – мектеп ұжымының ауыл-ауылға бөлініп, әрқайсысы өзінше бір шағын қазақ ауылының тыныс-тіршілігін бейнелеуі болды. Әр “ауыл” өз атауын алып, ұлттық нақышта безендіріліп, киіз үйлер тігіліп, дастархандар жайылды. Ауылдар бір-бірімен өнер, қонақжайлылық және ұлттық дәстүрлерді көрсету арқылы жарыса отырып, мерекенің ажарын одан әрі аша түсті.

Оқушылар мен ұстаздар ұлттық киімдер киіп, қазақ халқының бай мәдениеті мен салт-дәстүрін көркем түрде көрсетті. Әр ауыл өз өнерін ортаға салып, ән шырқап, би билеп, түрлі сахналық көріністер қойды. Домбыра үні күмбірлеп, ұлттық әндер шырқалып, көрермендерге ерекше әсер сыйлады. Сонымен қатар, салт-дәстүрлерден үзінділер көрсетіліп, тұсаукесер, беташар сияқты ғұрыптар сахналанды.

Мереке барысында ұлттық ойындар да кеңінен ұйымдастырылды. Арқан тарту, асық ату сынды ойындар ойналып, қатысушылар өздерінің ептіліктерін, шапшаңдықтарын көрсетті. Бұл ойындар оқушылардың қызығушылығын арттырып қана қоймай, ұлттық мұрамызға деген құрметін күшейте түсті.

Әр ауылда жайылған ақ дастархан берекенің, молшылықтың белгісіндей болды. Наурыз көже таратылып, қонақтарға ақжарма тілектер айтылды. Үлкендер бата беріп, жас буынға ақыл-өнеге көрсетті. Бұл көріністер қазақ халқының кеңпейілдігін, қонақжайлылығын айқын танытты.

Осындай мазмұнды да әсерлі өткен Наурыз мерекесі мектеп ұжымының ауызбіршілігін арттырып, оқушылардың ұлттық рухын көтерді. Әрбір қатысушы бұл күннен ерекше әсер алып, жүректеріне жылулық пен қуаныш сыйлады. Ұлыстың ұлы күні баршамызға құт-береке, ырыс пен ынтымақ әкелсін!